ការអនុវត្តគម្រោង "ផ្លូវសូត្រ" នឹងធ្វើឲ្យកម្ពុជារីកចម្រើន
- 2018-07-02 02:58:10
- ចំនួនមតិ 0 | ចំនួនចែករំលែក 0
ការអនុវត្តគម្រោង "ផ្លូវសូត្រ" នឹងធ្វើឲ្យកម្ពុជារីកចម្រើន
ចន្លោះមិនឃើញ
កម្ពុជានឹងមិនប្រឈមគ្រោះថ្នាក់ដូចប្រទេសស្រីលង្កា ដែលបានខ្ចីលុយចិនយកមកកសាងកំពុងផែ រហូតមិនមានលទ្ធផលសងបំណុលនោះទេ។ ប្រទេសស្រីលង្កាជំពាក់បំណុលចិនវ័ណ្ឌករហូតសងមិនរួចនេះ ដោយសារតែគម្រោង “ផ្លូវមួយ ខ្សែក្រវាត់មួយ” ដែលភាគច្រើនត្រូវបានគេហៅថា “ផ្លូវសូត្រ”។ ប្រទេសកម្ពុជាក៏បានប្រកាសគាំទ្រគម្រោងនេះដែរ ប៉ុន្តែថា កម្ពុជាមិនប្រឈមគ្រោះថ្នាក់ដូចស្រីលង្កានោះទេ។ អ្វីទៅដែលកម្ពុជាមិនធ្លាក់នៅក្នុងបំណុលវ័ណ្ឌកដូចជាស្រីលង្កា?
ឆ្លើយតបនឹងសំណួរខាងលើនេះ លោកបណ្ឌិត នាក់ ចិន្តារិទ្ធិ ប្រធានមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ បានលើកឡើងថា ប្រទេសស្រីលង្កាបានខ្ចីបំណុលចិនយកមកសាងសង់កំពង់ផែ ៤-៥ពាន់លានដុល្លារ ប៉ុន្ដែការវិនិយោគមិនចំណេញព្រោះអត់មានកប៉ាល់ចូល ឬកប៉ាល់ចូលតិចពេក ម៉្លោះហើយមិនអាចរកចំណូលសងចិនវិញបាន។ ទន្ទឹមនឹងនេះមានកម្ចីផ្សេងៗទៀត។ ចំពោះប្រទេសកម្ពុជាវិញ គិតគូរច្បាស់លាស់ ដោយមិនបានខ្ចីលុយចិនមកសាងសង់ហេដ្ឋារចនាសម្ពន្ធនោះទេ ប៉ុន្តែបង្វែរទៅជាការវិនិយោគវិញ។ "**យើងអត់ខ្ចីលុយទេ យើងឲ្យខាងឯកជនមកវិនិយោគ។ ឧទាហរណ៍ដូចជាផ្លូវល្បឿនលឿន Express Way ភ្នំពេញ-ក្រុងព្រះសីហនុ ដែលមានទំហំទឹកប្រាក់ប្រមាណជា ២ពាន់លានដុល្លារ តែមិនមានជាកម្ចីទេ តែជាការវិនិយោគ។ យើងអនុញ្ញាតឲ្យសាងសង់ហើយគ្រប់គ្រងខ្លួនឯងដល់ចប់កុងត្រា ត្រូវប្រគល់ឲ្យរាជរដ្ឋាភិបាលកម្ពុជាវិញ។ គម្រោងផ្សេងៗទៀតក៏ធ្វើដូចនេះដែរ។**"
ទិន្នន័យគិតត្រឹមឆមាសទី១ កាលពីឆ្នាំ ២០១៧កន្លងទៅ របស់ក្រសួងសេដ្ឋកិច្ចស្ដីពីបំណុលសាធារណៈកម្ពុជាបានបង្ហាញថា កម្ពុជាជំពាក់ចិន ក្នុងទំហំទឹកប្រាក់ជិត៤ពាន់លានដុល្លារ ស្មើនឹង ៤២.៩៨ភាគរយ នៃបំណុលសរុប។ តួលេខនេះ ចិនបានឈរលំដាប់លេខរៀងទីមួយ ដែលកម្ពុជាបានជំពាក់ ក្នុងចំណោមម្ចាស់បំណុលផ្សេងទៀត។
ទោះយ៉ាងណា លោកបណ្ឌិត នាក់ ចិន្តារិទ្ធិ ប្រធានមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រ បាននិយាយនៅក្នុងសិក្ខាសាលាស្ដីពី "គំនិតផ្ដួចផ្ដើមផ្លូវមួយខ្សែក្រវាត់មួយ និងការអភិវឌ្ឈប្រទេសកម្ពុជា" នៅសណ្ឋាគារកាំបូឌីយ៉ាណា កាលពីប្រឹកមិញនេះថា កម្ពុជាបានខ្ចីបុលចិនប្រមាណជា ៤០% នៃបំណុលសរុបនោះ គឺប្រទេសកម្ពុជានៅមិនទាន់ក្លាយជាប្រទេសជំពាក់បំណុលវ័ណ្ឌក ឬ មានសញ្ញាលឿង ក្រហមនៅឡើយ។ ឯគម្រោងផ្លូវសូត្រ ដែលត្រូវធ្វើការអភិវឌ្ឈន៍ថ្មីៗនេះ ក៏មិនបង្កើនបំណុលដែរ គឺកម្ពុជាប្រើប្រាស់ការវិនិយោគ មិនប្រើប្រាស់កម្ចី។
សូមចុចអាន៖ ច្បាស់ហើយ! ដឹងពេលវេលាបញ្ចប់ការសាងសង់ផ្លូវល្បឿនលឿន ដំបូងបង្អស់នៅកម្ពុជា
ការលើកឡើងរបស់ប្រធានមជ្ឈមណ្ឌលកម្ពុជាដើម្បីស្រាវជ្រាវផ្លូវសូត្រសមុទ្រខាងលើនេះ គឺជាការឆ្លើយតបទៅនឹងរបាយការណ៍មួយ ដែលមានមូលដ្ឋាននៅសហរដ្ឋអាមេរិក បានធ្វើការសិក្សាអំពីផលវិបាក នៃគម្រោង “ផ្លូវមួយខ្សែក្រវាត់មួយ” របស់ចិន ទៅលើបន្ទុក នៃបំណុលសាធារណៈ ដែលត្រូវធ្លាក់ទៅលើបណ្ដាប្រទេសពាក់ព័ន្ធក្នុងគម្រោងដោយក្នុងនោះប្រទេសខ្លះ កំពុងប្រឈមមុខនឹងហានិភ័យខ្ពស់ ដោយសារតែកំពុងវ័ណ្ឌកដោយបំណុលដែលខ្ចីពីចិន ដើម្បីប្រើប្រាស់ក្នុងគម្រោង។
មជ្ឈមណ្ឌលអភិវឌ្ឍពិភពលោក (Center for Global Development) ដែលជាវិទ្យាស្ថានស្រាវជ្រាវឯករាជ្យ មានមូលដ្ឋាននៅសហរដ្ឋអាមេរិក បានធ្វើការសិក្សារកឃើញថា ប្រទេសចំនួន៨ ដែលក្នុងនោះរួមមាន ដូចជា ប៉ាគីស្ថាន ម៉ុងហ្គោលី ជីប៊ូទី ឡាវ និងប្រទេសមួយចំនួនទៀត នៅក្នុងតំបន់អាស៊ីកណ្ដាល គឺជាក្រុមប្រទេសដែលកំពុងប្រឈមនឹងហានិភ័យខ្ពស់បំផុតដោយសារតែបន្ទុកដ៏ធ្ងន់ធ្ងរ នៃបំណុលដែលខ្ចីពីចិន ក្នុងក្របខ័ណ្ឌនៃគម្រោង "ផ្លូវមួយខ្សែក្រវាត់មួយ"។
ប្រទេសកម្ពុជាបាននិយាយថា ខ្លួនគឺជាអ្នកគាំទ្រដល់កិច្ចផ្ដួចផ្ដើមខ្សែក្រវាត់ និងផ្លូវ (BRI) របស់ចិនចាប់តាំងពីឆ្នាំ ២០១៣ មកម្ល៉េះ។
កាលពីឆ្នាំ ២០១៣ លោកប្រធានាធិបតី ហ្ស៊ី ជិនពីង បានដាក់ជាគោលនយោបាយយុទ្ធសាស្ត្រ «ខ្សែក្រវាត់សូត្រ និងផ្លូវសូត្ររបស់ចិន» ដោយផ្ដោតលើ ការតភ្ជាប់ទំនាក់ទំនង និងកិច្ចសហប្រតិបត្តិការល្អ រវាងប្រទេសក្នុងតំបន់នានា និងសាធារណរដ្ឋប្រជាមានិតចិន។ គម្រោងនេះដើម្បីរំលឹក និងធ្វើឲ្យរស់ឡើងវិញនូវផ្លូវក្រណាត់សូត្រ ដែលដែនដីចិនធ្លាប់មានតួនាទីសំខាន់បំផុតក្នុងអតីតកាល។
គម្រោង ”ផ្លូវមួយខ្សែក្រវាត់មួយ” របស់ចិននេះ គឺជាគម្រោងហេដ្ឋារចនាសម្ព័ន្ធផ្លូវថ្នល់ ខ្សែរថភ្លើង បំពង់បង្ហូរឧស្ម័ន និងកំពង់ផែជាច្រើន ដើម្បីផ្សារភ្ជាប់ចិន ជាមួយនឹងទ្វីបអឺរ៉ុប អាស៊ី និងអាហ្វ្រិក ហើយតាមរយៈនេះ ចិន នឹងពង្រីកដែនឥទ្ធិពលពាណិជ្ជកម្មរបស់ខ្លួនទូទាំងសកលលោក។ រហូតមកទល់នឹងពេលនេះ មានប្រទេសមិនតិចជាង ៦០ប្រទេសឡើយ ដែលបានចូលរួមអភិវឌ្ឍន៍ហេដ្ឋារចនាសម្ពន្ធរបស់ប្រទេសខ្លួន ដោយយោងតាមគោលការណ៍របស់គម្រោងខាងលើ៕