ខេត្តកំពត​ មាន​តំបន់​ទេសចរណ៍​ស្ទើរតែ​គ្រប់ប្រភេទ​ទៅហើយ ដែល​បាន​ក្លាយ​គោលដៅទេសចរណ៍​ដ៏ពេញ​និយម​បំផុតមួយ ជាពិសេស​គឺភ្នំបូកគោ និង​រមណីយដ្ឋាន​តាម​ដងព្រែក​កំពត ប៉ុន្តែ​នៅខ្វះ​តំបន់​ឆ្នេរសម្រាប់​ការកម្សាន្តរបស់ភ្ញៀវ។ ដើម្បីស្រូបភ្ញៀវបន្ថែមទៀតនោះ រដ្ឋបាល​ខេត្តកំពត​ ក្រោមការដឹកនាំ​របស់​លោក ម៉ៅ ធនិន បាន​នឹង​កំពុងរៀបចំ​អភិវឌ្ឍតំបន់​ឆ្នេរនៅក្នុងខេត្តនេះ ហើយ​ក៏នឹង​​រៀបចំច្រើនកន្លែងទៀតផង​នាពេលអនាគត។

ក្នុងសន្និសីទ​កាសែត​ដែលរៀបចំ​ដោយអង្គភាព​អ្នកនាំពាក្យ​រាជរដ្ឋាភិបាល​ នាព្រឹកថ្ងៃទី១៦ ខែកុម្ភៈ ឆ្នាំ​២០២៣​ថា លោក ម៉ៅ ធនិន អភិបាល​ខេត្តកំពត បាន​បញ្ជាក់​ថា នៅក្នុង​ខេត្តកំពត មានឆ្នេរសមុទ្រ​​ដែលលាត​សន្ធឹងប្រវែង ៦៥គីឡូម៉ែត្រ។ យ៉ាងណា​មិញ​លោក​លើកឡើងថា កន្លងមក​ខេត្តកំពត​មិនមានឆ្នេរនោះទេ ប៉ុន្តែឥឡូវនេះរដ្ឋបាលខេត្តគឺអភិវឌ្ឍឆ្នេរជាប់ជាមួយព្រែក​កំពត​តែម្តង។

លោក​អភិបាល​ខេត្ត​ បាន​គូសបញ្ជាក់​ដូច្នេះថា៖« ឆ្នេរនោះ យើងអាច​ទទួលទានអាហារ​នៅពេល​ល្ងាច និង​គយគន់ថ្ងៃលិច​ដែល​ជាប់ប៉ប្រះ​ជាមួយនឹងភ្នំបូកគោ ហើយ​ប្រកប​ដោយ​ខ្យល់អាកាសល្អ។ ហើយ​នៅទិសដៅ​ខាងមុខនេះ យើងនឹង​បង្កើត​ឆ្នេរថ្មីៗទៀត ដើម្បីស្រូបទេសចរ»។

យោងតាម​ក្រសួង​ទេសចរណ៍​ បាន​ឱ្យដឹងថា គិត​ពីថ្ងៃទី៣០ ខែមករា ដល់ ៥ ខែកុម្ភៈ ឆ្នាំ​២០២៣ នៅទូទាំងប្រទេស​ ទទួលបានភ្ញៀវទេសចរផ្ទៃក្នុង​សរុបជាង ៣០ម៉ឺននាក់។ ក្នុងនោះខេត្តកំពត ឈរនៅលេខរៀង​ទី៧ ដែល​ទទួលបានភ្ញៀវ​ជាង ២ម៉ឺន ២ពាន់នាក់៕

អត្ថបទ៖ សំភី