អភិបាល​រងរាជធានីភ្នំពេញ លោក កើត​ ឆែ ​បាន​បង្ហោះរូបភាព​ដែល​បង្ហាញ​ពីផ្លូវក្រវាត់ក្រុង​ទី៣ ​ក្នុងភូមិសាស្រ្ត​រាជធានីភ្នំពេញ ដែលគ្រោង​នឹង​បញ្ចប់​ការសាងសង់នៅ​ក្នុងខែឧសភាខាងមុខនេះ។

សូមជម្រាប​ថា ផ្លូវក្រវាត់ក្រុងមួយខ្សែនេះ មាន​ប្រវែងជិត ៥៣គីឡូម៉ែត្រ ចាប់ផ្តើមពីផ្លូវជាតិលេខ៤ ត្រង់ចំណុចគីឡូម៉ែត្រលេខ ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ កាត់ផ្លូវជាតិលេខ២ ផ្លូវជាតិលេខ២១ ស្ពាន​ឆ្លងកាត់ទន្លេបាសាក់ ទៅកោះអន្លង់ចិន មកបញ្ចប់ត្រឹមផ្លូវជាតិលេខ១ ត្រង់ចំណុចគីឡូម៉ែត្រលេខ ២៤+៨៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល (ផ្លូវមេ)។

យ៉ាងណាមិញ​ ការសាងសង់​ផ្លូវក្រវាត់ក្រុងទី៣ បច្ចុប្បន្ននេះ នៅមិនទាន់ពេញលេញ​ជាលក្ខណៈ​ផ្លូវក្រវាត់​ក្រុងនៅឡើយ​ ព្រោះនៅសល់មួយផ្នែកទៀត គឺ​ប៉ែកខាងកើត ដែលមាន​ប្រវែង​ប្រមាណ ៣៤គីឡូម៉ែត្រ។ ផ្លូវនេះ​ត្រូវសាងសង់ជាផ្លូវ៤គន្លង (ពីរគន្លងទៅ ពីរគន្លងមក) ចេញពីមហាវិថីឈ្នះឈ្នះ (ចំណុចប្រសព្វផ្លូវជាតិលេខ៦) រហូតដល់ចំណុចប្រសព្វផ្លូវលេខ៧០បេ ឆ្លងកាត់កោះចំនួន២ គឺកោះដាច់ និងកោះតាង ដោយត្រូវសាងសង់ស្ពានឆ្លងទន្លេមេគង្គចំនួន៣ ក្នុងនោះស្ពានទី១ (ផ្លូវជាតិលេខ៦-កោះដាច់) មានប្រវែង ១៣១១ម៉ែត្រ ស្ពានទី២ (កោះដាច់-កោះតាង) មានប្រវែង ៥៧៩ម៉ែត្រ និងស្ពានទី៣ (កោះតាង-ផ្លូវ៧០បេ) មានប្រវែង ១០៤៤ម៉ែត្រ គ្រោងចំណាយថវិកាប្រមាណ ២៤០លានដុល្លារអាមេរិក។ នេះបើតាមក្រសួង​សាធារណការ និងដឹកជញ្ជូន៕

អត្ថបទ៖ សំភី