អស់ស្ទះ! ហ្គេម Jailbreak មានអ្នកដោនឡូតច្រើនយ៉ាងនេះ

2017-03-08 23:51:28
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តដែលធ្លាប់បានលេងនិងកំពុងលេងហ្គេមបែបវាយតប់ Jailbreak the game ប្រហែលជាមិនបានចាប់អារម្មណ៍ទេថា ហ្គេមដ៏ល្បីមួយនេះមានអ្នកដោនឡូតលេងដល់ទៅ ៧ ៨៣០០ ដោនឡូតឯណោះ។

លោក ឈួម រតនា(រាប់ពីឆ្វេងទី២) និងសមាជិកក្រុម Direxplay

លោក ឈួម រតនា ជាអ្នកឌីហ្សាញនិងជាសមាជិកម្នាក់ក្នុងក្រុម DirexPlay បានឲ្យក្រុមការងារ Sabay ដឹងថា យោងតាមទិន្នន័យដែលលោកទទួលបានពី Facebook Analysis ហ្គេម Jailbreak មានអ្នកចូលទៅដោនឡូតលេងជាង ៧ ៨៣០០ ដោនឡូត(សរុបទាំង Android និង iOS) ដោយឡែកបើគិតជាភាគរយគឺ Android មានចំនួនអ្នកដោនឡូតជាង ៤៩ ភាគរយ និង iOS ៥១ ភាគរយគិតតាំងពីថ្ងៃ សម្ពោធជាផ្លូវការថ្ងៃទី ៣០ ខែមករា រហូតដល់ថ្ងៃទី ៩ ខែមីនា ឆ្នាំ ២០១៧ ដែលជាចំនួនដ៏ច្រើនលើសលប់ បើធៀបនឹងហ្គេមមុនៗដែលក្រុមធ្លាប់ផលិតឡើង។

លោកនិងក្រុមការងារ DirexPlay ក៏បានធ្វើការថ្លែងអំណរគុណផងដែរចំពោះអ្នកទាំងអស់គ្នាដែលតែងតែគាំទ្រនិងផ្ដល់ជាមតិយោបល់ដល់ស្នាដៃបង្កើតហ្គេមថ្មីរបស់ក្រុមលោក ជាងនេះទៀតក្រុម DirexPlay នឹងព្យាយាមបន្តបង្កើតហ្គេមថ្មីៗបន្ថែមទៀតដែលអាចនឹងបង្ហាញខ្លួនក្នុងពេលឆាប់ៗនេះ។

កំណត់ត្រាហ្គេម Jailbreak ដែលធ្លាប់ធ្វើបានកន្លងមក

ចំពោះហ្គេម Jailbreak The game ជាហ្គេមដំបូងគេក្នុងប្រទេសកម្ពុជា ដែលធ្លាប់បំបែកកំណត់ត្រាអ្នកដោនឡូតច្រើនជាងគេ រហូតដល់ជាង(២០,០០០ ដង) ក្នុង App Store ជាប់ចំណាត់ថ្នាក់លេខ ១ លើគ្រប់ប្រភេទហ្គេម និងជាប់ចំណាត់ថ្នាក់លេខ ៣ នៅលើ Google Play Store លើប្រភេទហ្គេម Action ត្រឹមតែរយៈពេលតែ ៤៨ ម៉ោងប៉ុណ្ណោះក្រោយពីប្រកាសដាក់ឲ្យដោនឡូតលេងជាផ្លូវការកាលពីខែមករាកន្លងទៅ៕

ចុចទាញយកហ្គេមនៅទីនេះ Android | iOS

អត្ថបទ៖ រក្សា