ឥទ្ធិពលព្យុះនឹងអស់នៅថ្ងៃស្អែក តែភ្លៀងនៅបន្ដធ្លាក់រហូតដល់ភ្ជុំបិណ្ឌ
- 2014-09-17 12:23:36
- ចំនួនមតិ 0 | ចំនួនចែករំលែក 0
ឥទ្ធិពលព្យុះនឹងអស់នៅថ្ងៃស្អែក តែភ្លៀងនៅបន្ដធ្លាក់រហូតដល់ភ្ជុំបិណ្ឌ
ចន្លោះមិនឃើញ
ឥទ្ធិពលព្យុះទី ១៥ ដែលមានឈ្មោះថា កាល់ម៉េជី (Kalmaegi) ដែលបានបោកបក់នៅសមុទ្រចិនខាងត្បូងកាលពីម្សិលមិញនឹងមកដល់ឆ្នេរសមុទ្រវៀតណាមយប់នេះ ហើយនឹងបន្ដរហូតដល់ថ្ងៃស្អែក។ ថ្ងៃស្អែកត្បិតតែព្យុះនេះ បញ្ចប់នៅទីក្រុងហាណូយក្ដី ក៏ប៉ុន្ដែ ប្រទេសកម្ពុជា ក៏នៅបន្ដធ្លាក់ភ្លៀងរហូតដល់ភ្ជុំបិណ្ឌ ដោយសាររបបខ្យល់មូសុង និង ប្រព័ន្ធសម្ពាធទាប។ នេះបើតាមការឲ្យដឹងពីមន្រ្តីក្រសួងធនធានទឹកនិងឧត្តុនិយម។
សូមចុចអាន៖ បន្ទាយឆ្មារ ស្ថិតក្នុងចំណោមរតនសម្បត្តិពិភពលោកទាំង៥ដែលគេមើលរំលង
ទោះបីជាព្យុះនេះរលាយបាត់ទៅវិញក្ដី ក៏លោក អ៊ុំ រីណា បានបញ្ជាក់ថា ប្រទេសកម្ពុជានៅតែបន្ដធ្លាក់ភ្លៀងស្ទើរគ្រប់ទីកន្លែងនៅក្នុងព្រះរាជាណាចក្រកម្ពុជា គ្រាន់តែតំបន់ខ្លះច្រើន តំបន់ខ្លះតិច ដែលឥទ្ធិពលសម្ពាធទាប និង របបខ្យល់មុសុង អូសបន្លាយរហូតដល់ភ្ជុំបិណ្ឌ ឬលើសពីនេះ ព្រោះកម្ពុជាស្ថិតនៅក្នុងរដូវវស្សានៅឡើយ។
កម្រិតកម្ពស់ទឹកភ្លៀង និង កម្ពស់ទឹកជំនន់ ប្រៀបធៀបរវាងឆ្នាំ ២០១៤ និង ឆ្នាំ ២០១៣ នៅមិនទាន់អាចកំណត់បាននៅឡើយ។ "វាមិនទាន់អាចកំណត់បាននៅទេ ព្រោះឥឡូវទើបតែនៅក្នុងខែកញ្ញា ទាល់តែចប់រដូវវស្សា ទើបយើងអាចកំណត់បាន ប៉ុន្ដែ បើប្រៀបធៀបឥឡូវនឹងឆ្នាំមុននៅខេត្តព្រះសីហនុតំបន់ខ្លះកម្ពស់ទឹកភ្លៀងហាក់ច្រើនជាងឆ្នាំមុន តែខ្ញុំបញ្ជាក់ហើយគឺយើងមិនទាន់អាចកំណត់ឲ្យបានច្បាស់លាស់នៅឡើយ"។ លោក អុំ រីណា និយាយ។
តែទោះបីជាយ៉ាងណាក្ដី មន្រ្តីក្រសួងធនធានទឹក និង ឧត្តុនិយមរូបនេះបានអំពាវនាវឲ្យប្រជាពលរដ្ឋគ្រប់រូប ជាពិសេសបងប្អូនប្រជាពលរដ្ឋនៅតាមដងទន្លេ និង សមុទ្រ ត្រូវមានការប្រុងប្រយ័ត្នក៏ដូចជាយកចិត្តទុកដាក់ខ្ពស់ដើម្បីចៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ។
យោងតាមសេចក្ដីជូនដំណឹងរបស់ក្រសួងធនធានទឹក និង ឧត្តុនិយម ដែលចុះកាលបរិច្ឆេតថ្ងៃទី ១៦ ខែ កញ្ញា និង ចុះហត្ថលេខាដោយលោកលឹម គានហោ រដ្ឋមន្រ្តីក្រសួងធនធានទឹក បានឲ្យដឹងថា ព្យុះថ្មីមួយ Kalmaegi បានបោកបក់សមុទ្ទចិនខាងត្បូងកាលពីយប់មិញ។
ព្យុះនេះនឹងធ្វើដំនើរទៅដល់ឆ្នេរសមុទ្រវៀតណាមភាគខាងជើងនៅយប់ថ្ងៃទី ១៧ ខែ កញ្ញានេះ ហើយនឹងធ្វើឲ្យតំបន់មាត់សមុទ្រកម្បុជា មានភ្លៀងធ្លាក់បង្គួរទៅច្រើនព្រមទាំងមានខ្យល់បក់បោកខ្លាំង ជាពិសេសនៅខេត្តកោះកុង និង ព្រះសីហនុ ដែលអាចធ្វើឲ្យមានរលកសមុទ្រ ពី ១ ទី ២,៥ ម៉ែត្រ។
ប៉ុន្ដែ លោក អុំ រីណា បន្ថែមថា ឥទ្ធិពលព្យុះកាល់ម៉េជី នឹងរលាយបាត់ទៅវិញនៅថ្ងៃស្អែក ហើយរបបខ្យល់មូសុងនិរតី និង ប្រព័ន្ធសម្ពាធទាបនឹងបន្ដធ្វើឲ្យភ្លៀងធ្លាក់កាន់តែខ្លាំងស្ទើរទូទាំងប្រទេសរហូតដល់បុណ្យភ្ជុំបិណ្ឌឬលើសពីនេះ៕
អានសេចក្ដីជូនដំណឹងរបស់ក្រសួងធនធានទឹកទាំងស្រុងនៅខាងក្រោមនេះ៖
អត្ថបទ៖ ប៊ិន ប៊ុណ្ណា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
